Saturday, September 12, 2009

ನನ್ನೊಳಗೆ ನಾನೊಂದು ಪ್ರಶ್ನೆಯಾಗಿರುವೆ

ನನ್ನೊಳಗೆ ನಾನೊಂದು ಪ್ರಶ್ನೆಯಾಗಿರುವೆ
ಉತ್ತರವ ಹುಡುಕುವರಾರು?
ಒಳಗೊಳಗೆ ಸುಟ್ಟು ಬೂದಿಯಾಗಿರುವೆ
ಎದೆಯ ಕಿಚ್ಚು ಆರಿಸುವರಾರು?

ದಿಕ್ಕಿಲ್ಲದ ದಾರಿಯಲ್ಲಿ
ನಡೆ ನಡೆದು ಸೋತಿರುವೆ
ನೀರಿಲ್ಲದ ಊರಿನಲ್ಲಿ
ನಾ ಬಿಕ್ಕುತಿರುವೆ

ಹೇಳದಿರುವ ನೂರೆಂಟು ಮಾತುಗಳಿವೆ
ಕಿವಿಗೊಟ್ಟು ಕೇಳುವರಾರು?
ನನಸಾಗದೆ ಸತ್ತ ಕನಸುಗಳಿಗೆ
ಬೆಂಕಿ ಇಡುವರಾರು?

ಊರ ಜಾತ್ರೆಯಲ್ಲು
ನಾ ಒಂಟಿಯಾಗಿರುವೆ
ನನ್ನದಲ್ಲದ ಊರಿನಲ್ಲಿ
ನನ್ನವರ ಹುಡುಕುತಿರುವೆ

ನೋವುಗಳ ಭಾರ ತಾಳದೆ ಕುಸಿದಿರುವೆ
ಎತ್ತಿ ಹಿಡಿಯುವರಾರು?
ಪ್ರೀತಿಯ ಅರಸಿ ಸೋತು ಶರಣಾಗಿರುವೆ
ಅಪ್ಪಿ ಮುತ್ತಿಕ್ಕುವರಾರು?

ಮುಖವಾಡದ ಬದುಕು
ಭಾವನೆಗಳಿಗೆಲ್ಲಿ ಬೆಲೆ
ದೇವರಿಲ್ಲದ ಗುಡಿಯಲ್ಲಿ
ನಾ ಹರಕೆ ಹೊತ್ತಿರುವೆ

ನನ್ನೊಳಗೆ ನಾನೊಂದು ಪ್ರಶ್ನೆಯಾಗಿರುವೆ
ಉತ್ತರವ ಹುಡುಕುವರಾರು?
ಒಳಗೊಳಗೆ ಸುಟ್ಟು ಬೂದಿಯಾಗಿರುವೆ
ಎದೆಯ ಕಿಚ್ಚು ಆರಿಸುವರಾರು?