ಕ್ಲಿಕ್ ಆಯ್ತು ಕವಿತೆ

ಬಾರದವನ ಬರುವಿಕೆಗಾಗಿ
ಕಾದು ಕಲ್ಲಾಗುವ ಮೊದಲು
ನೋಡೊಮ್ಮೆ ಹಿಂತಿರುಗಿ
ಕಾದಿರುವೆ ನಿನ್ನದೊಂದು ಅಪ್ಪಣೆಗಾಗಿ
ನಿನ್ನ ಬೆನ್ನ ಹಿಂದೆ ಆಡಿಕೊಳ್ಳುವವರ
ನಾಲಿಗೆ ಸೀಳಲು

ಮೌನ ಮುರಿದು
ಮಾತಾಡಬೇಕಿದೆ ನೂರು ಮಾತು
ಆದರೆ ನಿನ್ನ ಮಾತಲ್ಲೂ
ಬರಿ ಅವನದ್ದೇ ನೆನಪು
ಅವನ ನೆನಪುಗಳಲ್ಲಿ ಬಂದಿಯಾಗಿರುವ
ನೀನವನ ಪ್ರೇಮಕೈದಿ
ನಾನಿನ್ನ ಕಾವಲುಗಾರ
ನಮ್ಮಿಬ್ಬರ ನಡುವೆ ಇನ್ನೆಂತಹ ಸಂಭಾಷಣೆ

ಹೇಳಬೇಕಿದೆ ಜಗಕೆ ಸಾರಿ
ಯೋಗ್ಯನಲ್ಲ ಅವನು ನಿನ್ನ ಕಾಯುವಿಕೆಗೆ
ಆದರೆ ನೋಯಿಸಲಾರೆ ಅವನಂತೆ ನಾನು
ಕಾಯುವೆ ನಿನ್ನೊಲುಮೆಗೆ ನಿನ್ನಂತೆ ಕಲ್ಲಾಗಿ

ಅವನ ನೆನಪು ಬತ್ತಿ
ಚಿಗುರೋಡೆಯುವುದು ನನ್ನ ಪ್ರೀತಿ
ಕಾಯುವೆ ಅಲ್ಲಿಯವರೆಗೂ
ನಿನ್ನ ಬೆನ್ನ ಹಿಂದಿನ ನೆರಳಾಗಿ
ನಿನ್ನದೊಂದು ಒಪ್ಪಿಗೆಗಾಗಿ

ಕಾದಿರುವೆ ಬಿಡುಗಡೆಗಾಗಿ

ಕಳಚಿಬಿಡಲೆ ದೇಹ

ಉಸಿರುಗಟ್ಟುತಿದೆ

ತಿರುಗಲಾರೆ ಹೊತ್ತು

ಸಾಕದರ ಋಣ

ಹುಡುಕುತಿರುವೆ ಕನ್ನಡಿಯೊಳಗೂ
ಅದರೊಳಗಿನ ನನ್ನನ್ನೆ
ಕಂಡಿದ್ದು ಮತ್ತದೆ
ಕೀವುಗಟ್ಟಿ ಜಿಣುಗುತ್ತಿರುವ
ಯಾವ ಮದ್ದಿಗು ಮಾಯದ
ಅದಕಂಟಿದ ಹುಣ್ಣುಗಳು
ಜಾತಿ ಬಣ್ಣ ರೂಪ ಮತ್ತಿನ್ನೆಷ್ಟೊ

ಆಹಾ ಏನದರ ತಳುಕು ಬಳುಕು
ಅಂದ ಚೆಂದ ಸಿಂಗಾರ
ಒಳಗಿನ ನನಗಲ್ಲವೆ
ಗೊತ್ತದರ ಹುಳುಕು
ಜಾತಿ ಬಣ್ಣ ರೂಪಾನುಸಾರ
ಕಂಡವರಿಗೆ ತಗ್ಗಿ ಬಗ್ಗಿ
ಹಲ್ಲುಗಿಂಜಿ ಮೇರೆವ
ಅದರ ಸೋಗುಲಾಡಿತನ
ಕೇಳಿದರೆ ಒಣ ಧಿಮಾಕು
ನಿನಗೇನು ಗೊತ್ತು
ಸಮಾಜದ ಕಟ್ಟು ಪಾಡು
ನನ್ನಿಂದ ನೀನು
ನಿನ್ನಿಂದ ನಾನಲ್ಲ
ಅಬ್ಬಾ ಅದೆಷ್ಟು ಅಹಂಕಾರ

ಗೊಂಬೆಯೊಂದು ಹಗ್ಗ ಕಳಚಿ
ಸೂತ್ರಧಾರಿಯ ಕೈ ಕಟ್ಟಿ
ತನ್ನಿಷ್ಟಬಂದಂತೆ ಕುಣಿದು
ಗಹ ಗಹಿಸಿ ನಕ್ಕು
ಸೊಕ್ಕಿ ಉಬ್ಬಿ ಮೆರೆದಂತೆ
ನನ್ನಿರುವಿಕೆಗೆ ಸಾಕ್ಷಿಯಾದ
ಆಕಾರವೇ ಸೆರೆಯಾಗಿಸಿ
ತನ್ನೊಳಗೆನ್ನ ಬಂಧಿಸಿದೆ
ಕಾದಿರುವೆ ಬಿಡುಗಡೆಗಾಗಿ!