ಕೇಳಲೊಲ್ಲವು ಕಂಗಳು

ಹೇಗೆ ಹೇಳಲಿ ಗೊತ್ತಾಗದಾಗಿದೆ
ಕಾಡಿ ಬೇಡಿ ಕೈ ಮುಗಿದರು
ಕೇಳಲೊಲ್ಲವು ಕಂಗಳು

ಬಂದ ಕಷ್ಟಗಳನ್ನೆಲ್ಲಾ ನುಂಗಿ
ಉಮ್ಮಳಿಸಿ ಬರುವ ದುಃಖವ ಹತ್ತಿಕ್ಕಿ
ಎದೆಯ ಕಟ್ಟೆ ಒಡೆಯದಂತೆ
ಕಲ್ಲ ಗೋಡೆ ಕಟ್ಟಿ
ಮುಖದ ಮೇಲೊಂದು
ಸುಳ್ಳು ನಗೆಯ ಚೆಲ್ಲಿದರು
ಕೇಳಲೊಲ್ಲವು ಕಂಗಳು
ಕಣ್ಣೀರ ಹಾಕುತಿವೆ

ಹೀಗೇಕೆ ಕಾಡುತಿವೆ?
ಯಾರಿಗೇನು ಅನ್ಯಾಯ ಮಾಡಿರುವೆ?
ಎಲ್ಲಿಗೆ ಹೋಗಲಿ? ಯಾರಿಗೆ ಹೇಳಲಿ?
ಎಳ್ಳ ಕಾಳಷ್ಟು ಕರುಣೆಯಿಲ್ಲ
ಜೀವ ಹಿಂಡಿ ಕೊಲ್ಲುತಿವೆ

ಹಳೆಯದನ್ನೆಲ್ಲಾ ಮರೆತು
ಗಂಟು ಮೂಟೆ ಕಟ್ಟಿ
ಹೊಸ ಕನಸ ಕಟ್ಟಲು
ಆ ಊರ ಬಿಟ್ಟು ಈ ಊರಿಗೆ ಬಂದು
ನೆಮ್ಮದಿಯಿಂದ ಕಣ್ಣು ಮುಚ್ಚಿದರು
ಮೊಂಡು ಬಿದ್ದಿವೆ ಕಂಗಳು
ಮತ್ತದೇ ಹಳೆಯ ಕನಸು ಕಾಣುತಿವೆ

ಪ್ರೀತಿ ಕುರುಡಂತೆ ಕಣ್ಣಿಲ್ಲವಂತೆ
ವಿಪರ್ಯಾಸ ನೋಡಿ
ಕಣ್ಣಲ್ಲೇ ಪ್ರೀತಿ ಹುಟ್ಟಿದೆ
ಬದುಕು ಬಲು ಕ್ರೂರ
ಕಂಗಳ ಮುಂದೆಯೆ ಪ್ರೀತಿ
ಸತ್ತು ಬಿದ್ದರು
ನಂಬಲೊಲ್ಲವು ಕಂಗಳು
ಮತ್ತದೇ ಪ್ರೀತಿಯ ಹುಡುಕುತಿವೆ

ಹೇಗೆ ಹೇಳಲಿ ಗೊತ್ತಾಗದಾಗಿದೆ
ಕಾಡಿ ಬೇಡಿ ಕೈ ಮುಗಿದರು
ಕೇಳಲೊಲ್ಲವು ಕಂಗಳು